
വടക്കാഞ്ചേരിയിൽ ഓടിക്കൊണ്ടിരുന്ന ഓട്ടോറിക്ഷയ്ക്ക് മുകളിലേക്ക് പന മറിഞ്ഞു വീണ് അപകടം. വാഹനത്തിലുണ്ടായിരുന്ന മൂന്ന് പേർക്ക് ഗുരുതരമായി പരിക്കേറ്റു. വടക്കാഞ്ചേരി കുറാഞ്ചേരി വളവിൽ വെച്ചായിരുന്നു അപകടം. ഡ്രൈവറുൾപ്പെടെ മൂന്ന് പേർക്കാണ് പരിക്കുപറ്റിയത്. പഴയന്നൂരിൽ നിന്ന് തൃശൂർ മെഡിക്കൽ കോളേജിലേക്ക് പോകുന്നതിനിടെയായിരുന്നു സംഭവം.
പഴയന്നൂർ സ്വദേശികളായ കുടുംബം സഞ്ചരിച്ചിരുന്ന ഓട്ടോറിക്ഷയാണ് അപകടത്തിൽപ്പെട്ടത്. ഓട്ടോ ഡ്രൈവറായ കാക്കരകുന്ന് വീട്ടിൽ സന്തോഷ്, അനുജൻ സനീഷ്,അമ്മ തങ്കം എന്നിവരാണ് അപകടത്തിൽപ്പെട്ടത്.
റോഡിനോട് ചേർന്നുള്ള കുന്നിൻ ചെരുവിൽ നിന്നിരുന്ന പന മരമാണ് കാറ്റിൽ കടപുഴകി ഓട്ടോറിക്ഷക്ക് മുകളിലേക്ക് വീണത്. മരം മറിഞ്ഞു വീണതോടെ നിയന്ത്രണംവിട്ട ഓട്ടോറിക്ഷ മറിഞ്ഞായിരുന്നു അപകടം. അപകടത്തിൽപ്പെട്ട സ്ത്രീയുടെ തലയ്ക്ക് ഗുരുതര പരിക്കാണുള്ളത്. ഇവരെ മറ്റൊരു വാഹനത്തിൽ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.